БИШКЕК, 16-сен. — Sputnik. Биринчи вице-премьер-министр Тайырбек Сарпашевдин айтымында, учурда республика боюнча 2374 шайлоо тилкеси добуш берүүчүлөрдү кабыл алууга даяр. Бул туурасында ал өкмөт өкүлдөрүнүн саясий партиялар менен жолугушуусунда билдирди.
"Биометрикалык маалыматтардын негизинде өздүгү такталбай жаткан жарандар үчүн кошумча Бишкек шаарында 39, ал эми Ош шаарында жети шайлоо тилкелери ачылды. Учурда 2 млн. 633 миң 834 жаран шайлоого катышууга толук даяр”, – деди.
Келе жаткан парламенттик шайлоодо добуш берүү укугуна ID-карт үлгүсүндөгү паспорту менен биометрикалык маалыматтарын тапшырган жарандар гана катыша алары кабарланган. Сарпашевдин айтымында, Кыргызстан боюнча 1994-жылкы үлгүдөгү паспорт менен жүргөн 63 миң жаранга жаңы ID-карт үлгүсүндөгү паспорт берилген. Вице-премьердин маалыматында, 12 миң адамдын көк паспортуна жеке номуру жазылган социалдык фонддун баракчасы чапталып, алар да добуш берүү укугуна ээ болушту.
