БИШКЕК, 15-сен. — Sputnik. Конституциялык палата "КР жарандарынын биометрикалык каттоодон өткөрүү жөнүндө" мыйзамы мамлекеттин Баш мыйзамына туура келет деген чечим чыгарганын аталган мекеме билдирди.
Муну менен палата "Бейөкмөт жана коммерциялык эмес уюмдардын ассоциациясынын" төрайымы Токтайым Үмөталиева менен юрист Нурбек Токтакуновдун биометрикалык маалымат чогултуу мыйзамга каршы келет деген билдирүүсүн четке какты.
Палатанын чечимине ылайык, жарандын жеке турмушу тууралуу маалыматты анын уруксатысыз чогултуу, сактоо жана жайылтуу, башкача айтканда, биометрикалык маалымат чогултуу улуттук жана жеке коопсуздук үчүн жасалат.
Чечим кабыл алууда Конституциялык палата биометрикалык идентификация пайдаланылган чет мамлекеттердин тажрыйбасын эске алганын белгилейт.
