БИШКЕК, 11-сен. — Sputnik. КМШ мамлекеттеринин арасындагы XII Эл аралык "Китеп искусствосу" сынагында Кыргызстандын бир катар басмаканалары жогорку баага татыганын Мамлекеттик китеп палатасынын директору Койчуман Момункулов билдирди.
Конкурстун жыйынтыгы менен Ош шаарындагы "Келкел" китеп дүкөнүнүн эмгек жамааты жергиликтүү китеп чыгармаларын жайылтуу жана эл аралык деңгээлде китеп алмашууну мыкты жүргүзгөнү үчүн грамота менен сыйланган.
Сынактын баш байгесине Кадыров менен Гарающенконун "Кыргызстан — көчмөндөрдүн жери" аттуу китепти даярдап жана басып чыгарганы үчүн "Раритет" басмаканасы ээ болду.
Темирлан Сарлыкбек уулунун "Манас — адамзаттын тарыхый мурасы" аттуу китебин даярдап, чыгарганы үчүн "Турар" басмаканасы "Сүрөт искусствосу" номинациясында I даражадагы диплом менен сыйланды.
"Балдар жана өспүрүмдөр үчүн китеп" номинациясынын II даражадагы дипломуна Кадыровдун "Кыргыз жомокторунун алтын топтому" китеби үчүн "Кутаалам" басмаканасы татыды.
Ал эми III даражадагы дипломго "Раритет", "Имак офсет" жана "Кутаалам" басмаканалары ээ болушту.
