БИШКЕК, 5-сен. — Sputnik. Президент Алмазбек Атамбаевди Ирандын президенти Хасан Роухани менен жолугушуусунун расмий аземи Тегеран шаарындагы "Саадабад" ак сарайлар комплексинде өткөрүлдү. Бул туурасында президенттин маалымат кызматы билдирди.
Андан соң Атамбаев менен Хасан Роухани Ардактуу кароолдун ротасынын катарын кыдырып чыгышты.
Расмий жолугушуу аземинен кийин президенттер тар чөйрөдө сүйлөшүүлөрдү жүргүзүштү.
Жолугушуунун жүрүшүндө Президент Алмазбек Атамбаев менен Ирандын Президенти Хасан Роухани эки тараптуу мамилелердин актуалдуу маселелерин, ошондой эле Кыргызстан менен Ирандын ортосунда соода-экономикалык кызматташуунун мындан аркы келечегин жана биргелешкен инфраструктуралык долбоорлорду ишке ашырууну талкуулашты.
"Биз Кыргызстан менен Ирандын ортосундагы аба каттамын ачуу маселесин карап чыгып, аны тездетүүнү пландап жатабыз", — деди Атамбаев.
Мамлекет башчысы Кытай — Кыргызстан — Тажикстан — Афганистан — Иран темир жолунун долбоору майда-чүйдөсүнө чейин сүйлөшүлгөндүгүн кошумчалады.
Жолугушуунун соңунда Атамбаев Иран тарапты Кыргызстандагы ири гидроэлектростанциялар долбоорун иштетүүгө чакырганын билдирди.
