БИШКЕК, 3-сен. — Sputnik. Бүгүнкү күндө шайлоочулардын тизмесине биометрикалык маалымат тапшырган 2 миллион 595 миң 366 адам катталганын премьер-министр Темир Сариев маалымат жыйынында билдирди.
Анын айтымында, учурда биометрикалык маалыматты 2 миллион 710 миң 622 кыргызстандык тапшырган.
"Дагы бир жолу эскертем, 20-сентябрга чейин ар бир жаран өзүн тизмеден текшериши керек. Андан кийин текшерүүгө кеч болуп калат", — деди өкмөт башчы.
2011-жылы өткөн акыркы президенттик шайлоодо 3 миллион 32 миң 666 кыргызстандык тизмеге кирип, анын 1 миллион 858 миң 632си гана добуш берүүгө катышкан.
2014-жылдын августунда башталган биометриклаык маалымат чогултуу жараяны 2015-жылдын 20-августунда аяктайт. Талапка ылайык, 16 жаштан жогору бардык жарандар манжа издерин, санарип сүрөтүн жана кол тамгасын тапшыруусу зарыл. Жалпы жонунан 3 миллион 641 кыргызстандыктын биометрикалык маалыматын алуу болжолдонууда. Парламенттик шайлоо 4-октябрга белгиленген.
