БИШКЕК, 2-сен. — Sputnik. Доллар менен евро ЕАЭБ өлкөлөрүнүн соода мамилелеринен четтетилиши керектигин Sputnik агенттигине каржы маселелери боюнча серепчи Андрей Красников Мамлекеттик Думага жөнөтүлгөн ЕАЭБ алкагында каржы рыногун түзүү боюнча мыйзам долбоорун түшүндүрүп жатып билдирди.
Бирдиктүү каржы рыногун түзүү боюнча макулдашууну ратификациялоо жөнүндө мыйзам долбоорун Думага Владимир Путин киргизди. Документтин калыб алынышы менен, ЕАЭБ өлкөлөрү бардык валюталык операцияларды доллар менен еврого которбостон жүргүзө алат.
Красниковдун айтымында, Кыргызстанга мындай документ абдан зарыл.
"Бул бизди доллар менен евродон кутултпайт, анткени биздин тышкы карызыбыз чоң. Бирок ЕАЭБ үчүн бул жакшы мүмкүнчүлүк", — деди эксперт.
Серепчи чет элдик валютаны четтетүү үчүн миграциялык агымды жана товарлардын ооштурулушун жөнгө салуу керек деп эсептейт.
"Банктардын валютаны конвертациялоо муктаждыгы жоюлат. Бул жалпы иштин натыйжалуулугун арттырарында шек жок. АКШ өз санкциялары менен ЕАЭБ өлкөлөрүнө да, өз жарандарына да тоскоолдук жаратып, банктардын ишин татаалдатууда. Муну ички саясатка кийлигишүү деп атоого болот", — деди Красников.
Кыргызстан август айынан тарта Армения, Белоруссия, Казакстан жана Россия менен катар ЕАЭБге толук укуктуу мүчө болду. Мындан улам кыргыз-казак чек арасындагы бардык бажы процедуралары жоюлган. Кыргызстандын аймагында бирдиктүү бажы тарифи жана өндүрүмдөргө карата ЕАЭБдин тышкы экономикалык бирдиктүү товар номенклатурасы жана Бажы биримдигинин техникалык регламенти койгон бирдиктүү талаптар бекитилген.
