БИШКЕК, 1-сен. — Sputnik. Премьер-министр Темир Сариев Оштогу иш сапарынын алкагында Алай районунда социалдык объектилерди ачып жатып, шайлоодо орун албай калгандар чычалабай шайлоо жыйынтыгын тааныш керектигин айтты.
Премьер быйылкы парламенттик шайлоону биометрикалык маалымат топтоо жолу менен ачык-айкын өткөрүүгө бардык аракет көрүлүп жатканын белгилеп, бир катар жагдайларга токтолду.
"Кыргыз өкмөтү бул шайлоону таза, ачык-айкын, эч кандай мыйзам бузуусуз өткөрүүгө даяр. Шайлоого катышкан партиялар мыйзамдарды чынчылдык менен аткарып, ал эми жетиштүү добуш албай калгандары чычалабай, шайлоонун жыйынтыгын тааныш керек", — деди Сариев.
2015-жылдын 4-октябрында парламенттик шайлоо өтөт. Бул шайлоодо автоматташтырылган урналар колдонулат жана биометрикалык маалыматтарын тапшырган жарандар гана шайлоого катыша алат.
