БИШКЕК, 31-авг. — Sputnik. Кыргызстандык 58 абитуриент Россиянын Красноярск шаарында Сибирь Федералдык университетинен билим алуу үчүн жөнөп кеткенин аталган окуу жайдын бүтүрүүчүлөр ассоциациясынын өкүлү Сталбек Асылбеков билдирди.
"Замандаш" ассоциациясынын билдирүүсү боюнча, Асылбековдун айтымында, бюджеттик бөлүмгө өткөн кыргызстандык студенттер 27-августта Красноярск шаарына жөнөп кетишкен.
"Учурда студенттер университеттин жатаканаларына жайгаштырылды. Мындан тышкары, кампус жана окуу шарттары менен таанышып жатышат", — деди Асылбеков.
Сибирь Федералдык университети 2009-жылдан бери Кыргызстандан абитуриенттерди кабыл алат. Учурда аталган окуу жайда 520 кыргызстандык студент билим алууда.
Быйыл кирүү экзамендерин Кыргызстандын бардык аймагынан 520 окуучу тапшырып, 58 абитуриент техникалык жана инженердик багыттагы окууга жолдомо алышкан.
