40 күндөн кийин Адилет министрлиги "Ар-Намыс" саясий партиясы каттоодон өткөнү жөнүндө күбөлүк ыйгарган. Анын биринчи съезди 2000-жылы 5-январда өткөн.
Экинчи, шашылыш съезди 2000-жылы 2-апрелде "Ар-Намыстын" Исанов көчөсүндө жайгашкан кеңсесинде өткөн. Ал партиянын лидери Феликс Кулов менен штабдын жетекчиси Эмил Алиевдин камакка алынышына, ошондой эле ЖКга өткөн шайлоодон кийинки саясий кырдаалга жана президенттик шайлоого карата даярдыкка байланыштуу чакырылган.
Уюмдун сайтында камакка алуулардан кийин съезд көмүскө иш шартына өтүп, Кулов менен Алиевди саясий камактагылар (намыстын туткундары) деп таануу жөнүндө чечим кабыл алганы айтылат.
2005-жылы 24-мартта болгон элдик ыңкылаптын натыйжасында, мурдагы президент Аскар Акаев өлкөдөн качып, эл "Ар-Намыс" партиясынын лидери Феликс Куловду эркиндикке чыгарган.
Акыркы, 2010-жылдагы парламенттик шайлоодо партия "Ата-Журт" жана КСДП партияларынан кийин үчүнчү орунга чыккан. "Ар-Намыска" 25 мандат тийген.
Партиянын ураанын "Ар намыс, Тартип, Жыргалчылык" деген үч сөз түзөт.
Саясий бирикменин максаты — экономикалык жактан өнүккөн, чыныгы укуктук, демократиялык мамлекетти жана ачык жарандык коомду куруу экенин "Ар-Намыстан" билдиришти.
