БИШКЕК, 27-авг. — Sputnik. Кыргызстандын ЕАЭБге бара турган продукциясына ветеринардык көзөмөл азырынча сактала турганын Экономика министри Олег Панкратов ЕАЭБ боюнча өткөн брифингде билдирди.
Үстүбүздөгү жылдын 21-августунда ЕЭК чек арадагы санитардык-карантиндик жана карантиндик-фитосанитардык көзөмөлдү жоюу боюнча чечим чыгарган.
"30 күндүн аралыгында бул процедуралар жөнөкөйлөштүрүлөт", — деди министр.
Панкратов ветеринардык көзөмөл биринчиден каттоодон өтпөгөн продукцияны чыгарууну чектөө жана аткезчиликтин алдын алуу максатында сакталып жатканын белгиледи.
"Бул Казакстандын өтүнүчү. Бирок бул маселенин чечилиш жолдору иштелип чыгууда", — деди чиновник.
Кыргызстан август айынан тарта Армения, Белоруссия, Казакстан жана Россия менен катар ЕАЭБге толук кандуу мүчө болду. Мындан улам кыргыз-казак чек арасындагы бардык бажы процедуралары жоюлган. Кыргызстандын аймагында бирдиктүү бажы тарифи жана ЕАЭБ ишмердүүлүгүнүн тышкы экономикалык бирдиктүү товар номенклатурасы жана Бажы союзунун техникалык регламенти тарабынан продукцияга болгон бирдиктүү талап бекитилген.
