БИШКЕК, 25-авг. — Sputnik. Советтер Союзу тараган соң кол жууп калган айыл чарба объектилерин калыбына келтирүү зарылдыгын премьер-министр Темир Сариев Ысык-Ата районундагы айыл чарбасында жаңы ыкма жана технологияларды киргизүүгө арналган республикалык семинарда билдирди.
Маалыматка ылайык, өкмөт башчы семинардын алкагында "Аталык-групп Элдан" ишканасындагы чачыратып сугаруунун жаңы технологиялары, үрөн тазалоонун заманбап жабдыктары менен таанышты.
Сариев дыйкан жана фермерлер арасында мындай семинардын өтүп жатканы маанилүү экенин белгиледи.
"Биздин максат мүмкүнчүлүктөрдү жогорулатуу. Ал үчүн жаңы технология, жаңы багыт менен кесипкөйлүктү айкалыштыруу зарыл. Советтер Союзу тараган соң айыл чарба тармагындагы объекттерди жоготуп алдык. Мына ошолорду кайрадан жандардырууга мезгил келди", — деди премьер-министр.
Муну менен катар малдын асыл тукумдуулугун жогорулатуу, уяң жүндүү койлорду өстүрүү боюнча өкмөт жакынкы аралыкта атайын программа кабыл аларын, үрөнчүлүк чарбаларын көбөйтүү менен түшүмдүүлүктү көтөрүү зарылчылыгын белгиледи.
"Тоолуу аймак болгондуктан бизде дыйканчылыкка ыңгайлуу жер аянты чектелүү. Ошондуктан, биз түшүмдүүлүктү көтөрүү менен айыл чарба тармагын өнүктүрүшүбүз керек. Бул үчүн өлкө аймагында күнөсканаларды курууну жайылтып, тамчалатып сугаруу сыяктуу жаңы ыкмаларды киргизишибиз керек", — деди Сариев.
Премьер-министр өкмөт жылына он миңдеген гектарды сугат жери катары өздөштүрүп жатканын, келечекте ирригациялык системаны жакшыртуу боюнча иштер аткарыларын кошумчалады.
