БИШКЕК, 25-авг. — Sputnik. Жамааттык коопсуздук келишими уюмунун (ЖККУ) Ыкчам кыймылга келүүчү жамааттык күчтөрдүн "Өз ара иштешүү-2015" деп аталган машыгуусу НАТОнун Европада өткөрүп жаткан аракеттерине жасалган жооп эмес. Бул туурасында ЖККУнун башкы катчысынын орун басары Валерий Семериков айтты.
Машыгуулардын ачылышы Псков облусундагы Россиянын Аба десанттык аскерлеринин 76-гвардиялык дивизиясынын базасында өттү.
Муну менен катар эле беш өлкөнүн аймагында НАТОнун "Ыкчам жооп кайтаруу" деп аталган ири машыгуусу өтүп, ага Түндүк атлантикалык альянстын 11 өлкөсүнүн аба-десанттык бөлүмдөрүнөн 5000 аскер катышууда.
"Биздин машыгууларды батыш өлкөлөрүнүн аймактарындагы НАТОнун азыркы окууларына теңтайлаша өткөрүлүп жатат деп кабыл албоону каалайт элем. Учурдагы биздин аскердик машыгуулар ЖККУга мүчө өлкөлөрдүн коопсуздук катчылары жана Коргоо министрлери тарабынан былтыр эле бекитилген",— деп айтты журналисттерге Семериков.
Баш катчынын орун басары уюмга НАТОнун окууларынын жүрүшү кызык экендигин, ал эми Түндүк атлантикалык Альянс ЖККУнун катышуучуларынын аскердик ыкмаларына көз салып, байкоо жүргүзүп жаткандыгын белгиледи.
Биргелешкен окууларды өткөрүүнүн негизги максаты — Жамааттык коопсуздук келишими уюмунун Ыкчам кыймылга келүүчү жамааттык күчтөрдүн башкаруу органдарынын өз ара иш алып барышын өркүндөтүү. Андан сырткары, талаа (аба) шартында аскердик контингенттин жана атайын даярдыктагы күчтөрдүн биргелешкен согуштук аракеттерин күчтөндүрүү.
Машыгууларга катышкандардын саны аскерлер, ыкчам топтор жана атайын даярдыктагы күчтөрдү кошкондо 2000ге чукулдап барат, буга кошумча 200гө жакын техника, 40 аскер учактары, тик учактар жана башка аскердик авиация пайдаланылууда.
