БИШКЕК, 10-июль — Sputnik. Баткен районундагы чек арадагы кезектеги инцидент тажик тараптын тиешелүү кызматы өз ара бекитилген тартип-эрежелерди Кыргызстандагы кесиптештери менен макулдашпагандыктан келип чыкты. Бул туурасында Баткен облусунун акими Кеңеш Салихов Sputnik маалымат агенттигине билдирди.
Жергиликтүү бийликтин өкүлүнүн айтымында, суу тирешүүсү 5-августта кайра чыга баштаган. Ал эми 8-августта Тажикстандын жарандары чек ара мыйзамдарын, жергиликтүү бийликтин өз ара орнотулган тартиптерин сактабастан, КРдин аймагына өз алдынча кирүүгө аракет кылышкан. Чек арачылар алардын экөөнү кармашкан. Ошол маалда тажик тараптан бирөө травматикалык куралдан ок чыгарган.
Окуя мындан 3-августта башталып, бир нече күн мурда эле басылган Көк-Таш айылындагы окуянын уландысы болуп калууда.
Баткен районунун акими Салихов акыркы чатакта тажикстандык тарап чек ара боюнча сүйлөшүлгөн эрежелерди сактаган эмес.
"Акыркы окуяда Тажикстан кызматтары өз ара бекитилген тартип-эрежелерди сактабай, өздөрүнүн аракеттерин биздикилер менен макулдашкан эмес. Керек учурда биз дайыма сөзсүз кайрылып, макулдашып, анан иш кылабыз. 8-августтагы чатакта алар жергиликтүү эл менен макулдашып, сүйлөшкөн эмес. Анын кесепетинен ушундай инцидент жаралды", — дейт Салихов.
Ал эми Баткен районундагы Көк-Таш айыл аймагынын башчысы Разия Өсөрова мурдагы сүйлөшүлгөндөй, Тажикстандын Чорку айылын суу менен камсыз кылчу канал ачылып, алар сууну алып жаткандыгын айтты.
"Тажик тараптарга суу азыр үзгүлтүксүз берилүүдө. Каналга утуру кум, жыгач-таш, топурак тыгылып, калып жатат. Ар бир эки саатка экиден Тажик жаранын ээрчитип барып, сууну тазалатып, ачып берип жатам", — деди Өсөрова.
Чатактан кийин эки тараптын чек ара өкүлдөрү шашылыш жолугуп, Кыргызстан тарап чек ара аймагындагы эрежелерди бузуп, ок чыгаргандарга кылмыш ишин козгоону талап кылды. Тажик тарап ок аткан кишини кармоо боюнча издөө иштери башталганын маалымдаган.
