БИШКЕК, 7-авг. — Sputnik. Жырылып кетүү коркунучун алдын алуу боюнча Адыгене тоо көлүнүн суусу жасалма жол менен азайтылууда деп билдирет ӨКМдин маалымат кызматы.
Тийиштүү мекемелердин кызматкерлеринен турган жумушчу топ 6-августта аталган көлгө атайын түтүктөрдү орнотуп, сифондук жол менен сууну азайтуу иштерин баштады.
Өзгөчө кырдаалдар министрлиги аталган метод менен бийик тоолуу көлдөрдүн деңгээлин азайтууну экинчи жолу колдонуп жатат. Былтыр 2014-жылы августта Адыгене көлүнүн деңгээли биринчи жолу жасалма төмөндөтүлгөн. Бийик тоолуу шартта иштөө үчүн атайын даярдыктагы бригада иш алып барууда, жабдуулар жана адистер тик учактын жардамы менен жеткирилип жатат.
Кыргызстанда 3600-4000 метр бийиктикте орун алган эки миңден ашык төө көлү бар. Абанын температурасынын жогорулашынан улам көлдөр толуп, жырылып кетүү коркунучун жогорулатууда, деп айтылат ӨКМдин маалымат кызматы тараткан билдирүүдө.
