БИШКЕК, 7-авг. — Sputnik. Жогорку Нарын каскадындагы ГЭС курула турган менчик жер ээлерине компенсация бериле турганын вице-премьер-министр Валерий Диль аталган ГЭСти курууга арналган жыйында билдирди.
Анын айтымында, Жогорку Нарын каскадындагы ГЭС куруу иштери ылдамдатылып, ага катышкан бардык структуралар так жана ыкчам иштеши керек.
"Бул курулуш иштерин улантуу үчүн жер тилкелеринин берилишине да тиешелүү. Жер ээлери менен тыгыз иштеп, төлөнүүчү компенсациянын түрү аныкталышы керек. Биз жер ээлерине акча каражатын же башка жактан ушул эле көлөмдө жер берүүнү сунуштап жатабыз", — деди чиновник.
Жыйын жүрүшүндө вице-премьер ГЭСтин курулуш иштеринин биринчи баскычы үчүн керектүү 554 гектар жер тилке маселеси чечилгенин белгиледи.
"Курулуш иштерин белгиленген мөөнөттө аякташы керек" — деди Диль.
Иш-чаранын жыйынтыгы менен мамлекеттик органдарга, "Электр станциялары" жана "Жогорку Нарын гидроэлектстанциялары" ишканаларына курулуш долбоору боюнча бир катар тапшырмалар берилди.
