БИШКЕК, 6-авг. — Sputnik. Кыргыз-тажик чек арасындагы чыр-чатакты жөнгө салуу боюнча сүйлөшүүлөрдүн натыйжасында Көк-Таш айылынын мүрзөсүнө кеткен жол жана тажиктердин Чорку айылын суу менен камсыз кылган канал ачылганын вице-премьер-министр Абдырахман Маматалиев билдирди.
Анын айтымында, ушу тапта чек арадагы абал турукташканы менен, эки мамлекеттин укук коргоо органдары күчөтүлгөн тартипте иш алып барышууда.
"Учурда жаңжалдын кесепеттери жана келтирилген зыян өлчөмү такталып, күнөөлүүлөрдү жоопко тартуу боюнча иликтөө иштери жүрүп жатат", — деди чиновник.
Маматалиев эки өлкөнүн өкмөттөрүнүн деңгээлинде түзүлгөн жумушчу топтор чыр-чатак болгон жерге барып, жергиликтүү эл арасында түшүндүрүү иштерин жүргүзүп жатышканын маалымдады.
"Сүйлөшүү учурунда чыр-чатактын себептери жана кырдаалды жөнгө салуу маселелери талкууланды", — дейт вице-премьер.
Чиновник сүйлөшүүлөрдүн алгачкы этабынын натыйжасында Кыргызстандын Көк-Таш айылынын тургундары үчүн мүрзөгө барчу жол жана Тажикстандын Чорку айылын суу менен камсыз кылчу канал ачылганын белгиледи.
