БИШКЕК, 5-авг. — Sputnik. Кыргызстан менен Түркмөнстандын ортосунда соода, экономика, медицина, маданият, спорт, туризм, илим жана башка тармактарда кызматташуу тууралуу 15 келишимге кол коюлду.
"Түркмөнстандын президенти тамашалагандай, мындан көп келишимге Кытай менен гана кол коюлган", — деди КР өлкө башчысы.
Алмазбек Атамбаев бул чындап ишке аша турган келишимдер экенин белгилеп өттү.
"Буга Бердымухамедов өкүлүнө Ысык-Көл жээгине беш жылдыздуу мейманкана куруу үчүн жер тандоого берген тапшырмасы далил боло алат", — деди президент.
Өз кезегинде Бердымухамедов эки мамлекеттин мамилеси документтерге кол коюу менен эле чектелбей турганын белгилей кетти.
"Коопсуздук, энергетика жана башка маанилүү тармактар биздин көз жаздымда калбайт", — деди ал.
Тараптар мындан ары да Кыргызстан менен Түркмөнстандын байланышын бекемдөө үчүн бардык мүмкүнчүлүктөрдү колдонууга убада беришти.
