БИШКЕК, 5-авг. — Sputnik. Ош облусунун казыяты 2015-жылдагы орозо битирдин эсебинен бүгүнкү күнгө карата жеке кайрылган жарандарга жана балдар үйлөрүнө, мүмкүнчүлүгү чектелген жарандарга жалпысы 55 900 сом материалдык көмөк көрсөттү. Бул туурасында аталган казыяттын маалымат кызматы билдирди.
Учурда жетишпеген бүлөлөргө, жетим-жесирлерге, мүмкүнчүлүгү чектелгендерге, оор абалдагы бейтаптарга кайрымдуулук жардамдарын көрсөтүүдө.
Алар Кара-Суу райондагы дүлөй балдар үчүн атайын жатак мектебинин балдарынан жана Ош шаарындагы көзү азиздер коомунун мүчөлөрүнөн кабар алышып, алардын да муктаждыктарына жараша акчалай жардам көрсөтүлдү.
Кыргызстан мусулмандар диний башкармалыгынын токтомуна ылайык, чогултулган битир садаганын 50 пайызы мечиттерде калат. 15 пайызы райондук баш имам хатиптерде, 15 пайызы облустук казыятта жана 20 пайызы муфтиятка бөлүнөт.
Битир садага алуу үчүн жарандардын арыздары Рамазан айынын биринчи күнүнөн тартып кабыл алынып, 17-июль күнү токтотулган.
