БИШКЕК, 4-авг. — Sputnik. Бишкектин №2 төрөт үйүндө операциядан кийин комадан чыкпай каза болгон казакстандык келиндин өлүмү боюнча Бишкек шаардык мэриясынын алдындагы Саламаттык сактоо департаменти кызматтык териштирүү үчүн комиссия түзгөнүн тийиштүү министрликтин маалымат кызматы билдирди.
Оорулуу Бишкекке Казакстандын Жамбыл облусундагы Жанатас шаарынан жатын шишигин алдыруу үчүн операция жасатканы келген.
Төрөт үйүнүн башкы дарыгери Азамат Алымбаев казакстандык келинге операция ийгиликтүү жасалганын, кан куйгандан кийин күчтүү реакция жүрүп кетип, оорулуу комага түшүп калганын маалымдаган. Казакстандык жаран эсине келбей жатып 1-август күнү каза болду.
