БИШКЕК, 3-авг. — Sputnik. Шайлоого катышууну каалаган партиялар шайлоо күрөөсүн коюу үчүн мамлекеттик "РСК Банкынан" жана "Айыл банктан" атайын эсеп ачышы керектигин Борбордук шайлоо комиссиясынын мүчөсү Канатбек Азиз Sputnik агенттигине билдирди.
Июлдун аягында Алмазбек Атамбаев парламенттик шайлоону 4-октябрга дайындоо боюнча буйрук чыгарган.
Учурда парламенттик шайлоого катышуу ниетин 34 партия билдирип, БШКга арыздарын берген.
Борбордук шайлоо комиссиясынын мүчөсү Канатбек Азиздин айтымында, 2015-жылы боло турган шайлоонун күрөөсү 5 миллион сомду түзөт.
"Шайлоочулардын эң аз дегенде 5 пайыз добушун алган саясий партиялар гана коюлган күрөөсүн ала алышат. Болбосо, партиялардын күрөөсү КРдин шайлоо системасын жакшыртууга жумшалат", — деди ал.
Канатбек Азиз кошумчалагандай, БШКнын мүчөлөрү үгүт иштери боюнча да талкууларды өткөргөн.
"Кээ бир партияларга үгүт иштерин жүргүзбөө боюнча эскертүү берилди. Көпчүлүгү аны угуп, жарнамалык материалдарын алышты. Азыркыга чейин дубалдарга түшүрүлгөн түстүү жазуулар боюнча маселе ачык бойдон калууда. Аны биз сөзсүз чечебиз", — деди БШКнын мүчөсү.
Үгүт иштери расмий түрдө 4-сентябрда башталат.
