БИШКЕК, 28-июль — Sputnik. Диний радикалдашууга каршы бирге күрөш жүргүзүү зарылдыгын премьер-министр Темир Сариев өлкөдөгү диний кырдаал жана коопсуздук маселелерине арналган жумушчу жыйында билдирди.
Өкмөт башчысы үстүбүздөгү жылдын 16-июлунда террористтик топтун Бишкектеги аракети Кыргызстандагы терроризмге жана диний радикализмге каршы күрөш, коопсуздук, диний агартуу маселелерин кайрадан карап чыгып, бул жаатта ишти күчөтүүнү талап кылганын белгиледи.
"Буга чейин диний радикализмдин коркунучтары бизден алыстай сезилсе, учурда өлкө коопсуздугуна коркунуч туудура баштады. Буга интернетте тарап жаткан ар кыл тасмалар мисал боло алат. Ошондуктан мамлекеттик бардык органдар, коомчулук бул коркунучка каршы туруп, бирге күрөшүү абзел", — деди Сариев.
Жыйын соңунда катышуучулардын бирдиктүү аракети менен жарандарга түшүндүрүү иштерин жүргүзүү, укук коргоо органдарына экстремисттик жана террористтик күчтөргө каршы күрөштү күчөтүү жана жазаларды күчөтүү, мечиттерди курууда мамлекеттик каттоого алууну иретке келтирүү тапшырмасы коюлду.
Ошондой эле 2014-жылдын 14-ноябрында президенттин жарлыгы менен бекитилген диний чөйрөдөгү мамлекеттик саясат боюнча концепциянын аткарылышын карап чыгуу тапшырылды.
