БИШКЕК, 21-июль — Sputnik. Атайын операция учурунда жок кылынган согушчандардын сөөгү берилбей жатканын айткан туугандары маалымат жыйын өткөрүп, сөөктөрдү кайтарып берүү үчүн Атамбаевге кайрылды.
Өткөн бейшемби күнү, 16-июлда Бишкек шаарынын борбордук бөлүгүндөгү үйлөрдүн биринен "Ислам мамлекети" террордук тобунун мүчөлөрү жок кылуу боюнча УКМК атайын операция жүргүзгөн. УКМКнын маалыматына ылайык, согушчандар "Ислам мамлекети" террористтик тобунун мүчөлөрү болгон.
Жок кылынгандардын биринин атасы Аманкул Итибаев анын баласы террорист болгон дегенге ишенбей турганын айтат.
"Ал намаз окучу, керек болсо, кумурскага да зыян келтирчү эмес. Туугандарым жана коңшулар аны абдан боорукер киши катары билчү. Аны террорист деп атагандарына ишенбейм. Уулумдун сөөгүн алууга жардам берүү үчүн президентке кайрылам. Аны биз салт боюнча жерге беришибиз керек", — деди Итибаев.
Жок кылынган башка жарандардын туугандарынын айтымында, аларга да сөөктөрдү бербей жатышат. Маалымат жыйынга келгендер жок кылынгандардын бардыгы Нарын облусунун Ат-Башы районунун тургундары экенин билдиришти.
