БИШКЕК, 20-июль — Sputnik. Экс-депутат Бишкек шаарында жок кылынган террордук топтун мүчөлөрү менен тыгыз байланышта болгонун Улуттук коопсуздук мамлекеттик комитетинин маалымат кызматы билдирди.
Бейшемби күнү, 16-июлда Бишкек шаарынын Горький жана Темиров көчөлөрүнүн кесилишинде УКМКнын атайын операциясынын натыйжасында эл аралык террордук топтун мүчөлөрү жок кылынган. Аталган топ өлкөдө бир нече террордук чабуулдарды жасоону пландаганын атайын кызмат билдирген. Операция маалында 4 согушчан жок кылынып, УКМКнын 4 аскери жаракат алган.
Ошондой эле, алынган маалыматтарга ылайык, кармалган экс-депутаттын жардамы менен куралданган Жумагуловдун тобу бир канча каржы мекемелерине жана жеке адамдарга кол салып, тоношу керек болчу. Алынган каражаттар өлкөдө туруксуздук жаратууга жана террордук топту каржылоого жумшалмак.
Учурда экс-депутат УКМКнын убактылуу кармоо жайына камакка алынды.
