БИШКЕК, 17-июль — Sputnik. Туруктуу салык-бюджеттик саясат Кыргызстандын макроэкономикалык стабилдүүлүктүн башкы шарты экенин Эл аралык валюта фондусу (ЭВФ) миссиясынын башчысы Эдвард Джемайель Кыргызстанга болгон иш сапарын жыйынтыктап жатып билдирди.
Джемайелдин айтымында, Россия жана региондордогу экономикалык өсүүнүн басаңдаганына карабастан КР экономикасы туруктуулукту сактап келет. Улуттук статистикалык комитеттин алдын ала маалыматы боюнча өнүгүү темпи (алтын казууну эсепке албаганда) 4,4 пайызга жетип, инфляция 4,5 пайызга төмөндөгөн. Муну менен бирге алгачкы беш айдын аралыгында акча которуулар 25 пайызга кыскарган. Мындан тышкары соода активдүүлүгү азайып, тейленбеген кредиттердин деңгээли өскөн.
"Алдыдагы боло турган парламенттик шайлоолордон улам максаттуу бюджеттик көрсөткүчтөрдөн баш тартуу тынчсызданууну жаратып келет. Кошумча киреше булагы болбогондуктан, өкмөт пландаштырылбаган чыгашалардын алдын алуусу керек", — миссия жетекчиси.
ЭВФ миссиясы парламенттин Банк кодексин биринчи окууда кабыл алышын алдыга карай кадам экенин белгилеп, Кыргызстан жакын арада банктарды реорганизациялоо жана карыздарды реструктуризациялоо боюнча агенттикти текшерүүсү зарыл экенин кошумчалады.
