Атамбаев мусулмандарды Орозо айт майрамы менен куттуктады

Жазылуу
Президент кылымдап калыптанган ислам дининдеги бул руханий дөөлөт адам баласын ар дайым алдыга, жакшылыкка жетелеп, жаш муунду туура жолго чакырып турарын билдирди.

БИШКЕК, 17-июль — Sputnik. Президент Алмазбек Атамбаев Орозо айынын аякташы жана көптөн күткөн айт майрамы менен куттуктады.

Өлкө башчы өз сөзүндө Орозо айы — руханий тазаланууга, пейилди оңоп, жакшылык жасоого умтулуу экенин белгиледи.

"Орозо айы — көңүлдөгү таарынычтарды кечип, сабырдуулукка жана кайрымдуулукка чакыруу. Элдин биримдигин, ынтымагын жана жергебиздеги тынчтыкты баарынан жогору тутуу", — деп айтылат Атамбаевдин куттуктоосунда.

Президент кылымдап калыптанган ислам дининдеги бул руханий дөөлөт адам баласын ар дайым алдыга, жакшылыкка жетелеп, жаш муунду туура жолго чакырып турарын билдирди.

"Адамзаттын мына ошол мыкты дөөлөттөрү Кыргызстаныбызды улам жаңы бийиктикке көтөрүүгө өбөлгө түзсүн. Ылайым ыйык Орозо айында сиздер ниет кылган жакшы тилектердин бардыгы кабыл болсун!", — деди Атамбаев.

Ошону менен бирге өлкө башчы Орозо айт ар бир үй-бүлөгө жакшылык, кубаныч алып келүүсүн, тынчтык, ынтымак жана биримдик беришин каалады.

Жаңылыктар түрмөгү
0