БИШКЕК, 15-июль — Sputnik. Премьер-министр Темир Сариев өлкөдөгү аймактык аэропортторду өнүктүрүү маселелерин талкуулаган жумушчу жыйында, тиешелүү органдарга бул жаатта тез арада атайын долбоор иштеп чыгууну тапшырды.
Жыйын жүрүшүндө Транспорт жана коммуникациялар министрлиги, "Манас" эл аралык аэропортунун жана Жарандык авиация агенттигинин жетекчилиги өлкө аймактарындагы аэропорттордун абалы боюнча маалымат беришти.
Премьер-министр Темир Сариев аларды оңдоо менен жарандарга ыңгайлуу шарт түзүү, транспорттук инфраструктураны жакшыртуу өкмөттүн милдеттеринин бири экенин айтты.
Транспорт жана коммуникациялар министри Аргынбек Малабаев Жалал-Абад жана Исфана шаарларындагы аэропортторду реконструкциялап, өнүктүрүү планы иштелип жатканын кабарлады.
Өкмөт башчысы аталган тармакты өнүктүрүү боюнча долбоорго Кыргыз-Орус өнүктүрүү фондунан насыя алууга мүмкүнчүлүк бар экенин билдирди.
