БИШКЕК, 13-июль — Sputnik. Бүгүн, 13-июлдан 14үнө караган түн – Кадыр түн деп билдирди Кыргызстан муфтийинин орун басары Равшан ажы Эратов Sputnik маалымат сайтына.
Анын айтымында, кадыр түндө Кыргызстандагы бардык мечиттерде баяндар окулуп, пайгамбардын хадистери айтылат.
"Кадыр түн негизи саат 23:00дө башталат. Муфтият тарабынан эки сааттык программа түзүлдү, бардык жума мечиттерге келген адамдарга хадистер туурасында баяндар айтылат. Бишкектеги мечиттерде жаштар үчүн конкурстар, суроо-жооптор, кызыктыруучу чакан белек-бечкектер болот", — деди Эратов.
"Мечитке барбагандар ак ниет менен Кудайды эстеп, тооп кылып, Куранды окуп, таанышып, кемчиликтер болсо кечирим сурап, пайгамбарыбызга салават айтыш керек. Үй-бүлөлөр кадыр түндү үйүндө отуруп, бүлө башчысы же апасы дин туурасында билгендерин бөлүшүп, кичүүлөргө, балдарга тарбиялык маанидеги насааттарын айтып берсе да жакшы болот", — деди муфтийдин орун басары.
Ал азыркы кездерде ыйык деп эсептелген бул түндүн тосуу багыты өзгөрүп кетип жаткандыгын айтып, түшүндүрмө берди.
"Акыркы мезгилде жаштар кечелерге чогулуп, музыканы даңкылдатып коюп, "кадыр түн тосуп жатабыз" деген туура эмес. Минтип кадыр түндүн кадырын кетирбеш керек", — деп кошумчалады Эратов.
Кадыр түн Орозонун 26-кечесинен 27чисине өтөрүндө тосулуп жатат. Ал эми айт 17-июлга белгиленген.
