БИШКЕК, 9-июль — Sputnik. Орозо айында битир садага берүү колунда бар ар бир мусулман баласы үчүн парз деп билдирди Кыргызстан мусулмандар дин башкармалыгынан.
2015-жылдагы Орозо айында ар бир адам 40 сомдон өйдө битир садага бериши лаазым. Ал 1,6 килограмм буудайдын, ундун, мейиздин же 3,2 килограмм арпа же курманын наркында болушу керек.
Кыргызстан мусулмандар дин башкармалыгы буудайдын баасын 25 сом, мейиздин баасын 200 сом, ундун баасын 32 сом, арпанын баасын 20 сом, курманын баасын 150 сом деп бекитти. Кыргызстан мусулмандар дин башкармалыгы битир садага берүүчү адам жогоруда көрсөтүлгөн баалардын кайсынысынан чыгарса, өз ыктыяры экендигин айтты. Ал бей-бечара муктаждардын пайдасы үчүн көбүрөөгүнөн чыгаруусу абзелдигин кошумчалады.
Муфтиятан Орозо айы аяктаган соң битир садага үкөктөрүн атайын түзүлгөн комиссия топтору ачып, колунда жок, жетим-жесирлерге, мүмкүнчүлүгү чектелгендерге таратып берилерин билдирди.
