БИШКЕК, 7-июль — Sputnik. Кыргызстандык "Тумар КР" тобу Түркиядагы "Yetenek Sizsiniz 2015" теледолбоорунун финалына чыкты. Жарым финал 5-июлда Стамбул шаарында өтүп, биздин бийчилер мүмкүн болгон 100 упайдын 91ин алды.
Долбоордун калыстары кыргызстандык бийчилердин чеберчилигин жогору баалашты. Калыстардын бири Мурат Боз бийчилердин чындап эле таланттуу экенин, абдан кызыктуу номерлерди тартуулаганын айтты.
"Дүйнө стандарттарына туура келген номерлерди бул сахнадан көрүү биз үчүн да абдан кызыктуу. Ар бириңерге ыраазычылык билдирем", — деди ал.
Калыстар тобунун дагы бир мүчөсү Эсер Йененлер бийчилердин сөөгү жок го деп таң калды.
"Адамдын сөөктөрү ушунча да ийилеби? Түшүнө албай турам. Бул сезондо көргөн эң жогорку бийлердин бири болду. Финалда дагы эмне болот деп күтөм", — деп таң калганын жашырган жок.
"Yetenek Sizsiniz 2015" теледолбоорунун финалы 10-июлда болот.
Атай Өмүрзаковдун тарбиялануучулары буга чейин Европанын бир катар мамлекеттеринде өз өнөрлөрүн тартуулап, көрүүчүлөрдүн жана калыстар купулуна толгон.
