БИШКЕК, 7-июль — Sputnik. Академик Абдылдажан Акматалиев жана Чыңгыз Айтматов атындагы Тил жана адабият институтунун жамааты Боом капчыгайындагы 1916-жылдагы Үркүндөгү кайгылуу окуяда курман болгондорго куран окутту. Бул туурасында Улуттук илимдер академиясынын маалымат кызматы билдирди.
Үркүндүн 100 жылдыгын белгилөө иш-чарасынын алкагында Улуттук илимдер академиясынын окумуштуулары бир топ илимий иш-чараларды өткөрүүнү пландоодо.
"Адабиятчылар, тарыхчылар бул окуяны изилдеп, жаңы көз караштагы илимий эмгектерди жаратышууда. Мисалы, менин жетекчилигимдин астында жаш окумуштуу Станалиева 1916-жылдын кыргыз адабиятында чагылдырылышы боюнча эмгек жазган. Дагы бир аспирантым ушул трагедия поэзияда кандай чагылдырылганы боюнча илимий иш жүргүзүп жатат. Биз, коомдук илимдер боюнча окумуштуулар курман болгондорго коюлган эстеликке барып, гүл коюп, таазим этип, куран окутуп келдик", — деди академик Акматалиев.
Май айынын соңунда президент Алмазбек Атамбаев "1916-жылдагы каргашалуу окуялардын 100 жылдыгы жөнүндө" Жарлыкка кол койгон. Анын алкагында бир нече иш-чаралар белгиленип, илимий конференциялар уюштурулуп, Үркүн кеңири эскерилмекчи.
