БИШКЕК, 7-июль — Sputnik. "Датка – Кемин" жогорку чыңалуудагы электр линиясы үчүн 334,5 чакырым электр зымы тартылганын "Кыргызстандын улуттук электр станциялары" ишканасы билдирди.
Маалыматка ылайык, жалпы жонунан 405 чакырым электр зымын тартуу каралган.
500 киловольттуу "Датка – Кемин" жогорку чыңалуудагы электр линиясы түштүктөгү "Датка" жана түндүктөгү "Кемин" подстанцияларын бириктирет. Линияны куруу иштери деңиз деңгээлинен 3 миң метр бийиктикте жайгашкан Кырк-Кыз, Тер-Жайла, Кызарт, Шылдырак ашууларында жүрүп жатат.
Учурда 500 кивольттуу "Кемин" подстанциясынын курулушу аяктады.
"Датка – Кемин" трассасы боюнча кирме жолдор жана 929 тирөөч үчүн котловандар бүттү. Дагы беш тирөөч жасалышы керек. 334,5 чакырым электр зымдары тартылды", — деп айтылат билдирүүдө.
Курулуш иштеринин алкагында кошумча 500 мегаватт кубаттуулуктагы автотрансформатор орнотуу жана "Ала-Арча" подстанциясындагы 200 мегаваттык эки автотрансформаторду 220 мегаваттык менен алмаштыруу каралган.
Аталган подстанциялар Бишкек шаарын электр менен камсыздайт. Келишимдин жалпы суммасы 390 миң долларды түзөт.
