БИШКЕК, 4-июль — Sputnik. Жоолук салынып атып, 5 сантиметрлик ийнени жутуп алган 11 жаштагы кызга Оштогу облустар аралык балдардын клиникалык ооруканасында операция жасалганын оорукананын жетекчиси Абдисамин Анарбаев Sputnik сайтына билдирди.
Маалыматка ылайык, окуя 28-июнда Сузак районунда болгон. 11 жаштагы кыз салынган жоолугун ийне менен төөнөйм деп атып, дем алганда аны жутуп алган. 5 сантиметрлик ийне кыздын өпкөсүнө кетип калган.
"Кызды алгач Жалал-Абадка алып келип, ренткенге тартышкан. Ийне өпкөгө тереңдеп кирип кеткендиктен бизге жөнөтүштү. Ошол эле күнү мен өзүм операция жасадым. Ийне өпкөнүн ичке бронхаларына чейин жетип, ошол жерде туруп калыптыр. 40 мүнөттөй операция кылып ийнени алдык", — деди ал.
Анарбаевдин айтымында азыр бейтаптын абалы жакшы, дене табы көтөрүлгөн жок, өз алдынча дем алып, басып жүрөт.
Аталган ооруканада өпкөгө кетип калган түрдүү заттарды алуу боюнча операциялар болуп турарын, оорукананын жетекчиси кошумчалады. Өзгөчө мисте, чемичкенин кабыгын өпкөдөн алуу боюнча операцияларды жасашат.
