БИШКЕК, 2-июль — Sputnik. Май, июнь айларында Бишкекте тамак-аштан ууланган 20 учур катталганын шаар мэриясынын маалымат кызматы билдирет.
Мамлекеттик санитардык-эпидемиологиялык көзөмөл борборунун маалыматы боюнча, май жана июнь айларында уулануудан 41 адам жабыр тарткан. Негизинен жарандар колдон жана коомдук тамактануучу жайлардан алган тамак-аш азыктарынан ууланганы белгилүү болду.
"Жеке тазалык эрежелерине көңүл кош мамиле, азыктардын сактоо мөөнөтүнүн өтүп кетиши, тамак даярдоонун туура эмес технологиясы, соода жана коомдук тамактануучу жайларда санитардык ченемдердин көзөмөлдөн чыгышы ууланууларга себеп болду", — деп айтылат билдирүүдө.
Өткөн жылы ушул мезгилде тамак-аштан 17 уулануу катталып, андан 32 адам жабыркаганы белгилүү болгон.
