БИШКЕК, 2-июль — Sputnik. Альпинизмдин техникалык классы боюнча Россиянын чемпионаты (эркектер арасындагы) Баткен облусунда өтөт. Бул тууралуу Екатеринбургдан келген команданын улуу машыктыруучусу Анатолий Ярунов Sputnik сайтынын кабарчысына билдирди.
Альпинизм боюнча Россиянын чемпионаты экинчи жолу Баткен облусундагы Каравшин капчыгайында өтөт. Мелдештер 15-июлда башталып, 2-августка чейин улантылат.
"Маршруттардын оордугу Россиянын чемпионатынын стандарттарына туура келет. Эрежеге ылайык, бул маршруттар боюнча биринчи разряддагы жана спорттун мастерлери өтөт. Учурда мелдешке катышуу үчүн Россиянын шаарларынан 12 команда арыз берди. Бир командада эки кишиден төрт кишиге чейин болот", — деди ал.
Чемпионат башталганга чейин командалар машыгууларды өткөрөт.
