БИШКЕК, 30-июнь — Sputnik. Кыргызстандын президенти Алмазбек Атамбаев маегинде күзүндө өтө турган парламенттик шайлоо алдында өлкөдөгү кырдаал туруктуу болоруна ишенерин билдирди.
"Бүгүнкү күндө кимдир бирөө радикалдык кадамдарга барат деп ойлобойм. Кыргызстан өзүнүн "араб жазын" башынан кечирди, эми бардык процесстер мыйзам чегинде өтөт. Менин пикиримде, мамлекетте шайлоодо мыйзамдуу түрдө жеңишке жетишем деген адилеттүү күрөшкө даяр саясий күчтөр суурулуп келе жатат", — деди президент.
Атамбаев өлкө жетекчилиги учурда шайлоого даярдык жана чыр-чатактын алдын алуу үчүн иш-чаралар өткөрүп жатканын Sputnik маалымат сайтына берген маегинде белгиледи.
"Биздин башкы максатыбыз – жыйынтыгынан эч ким күмөн санабаган таза шайлоо өткөрүү. Албетте, айрым тобокелчиликтер бар. Биз аларга да даярбыз. Бүгүнкү күндө өлкөдөгү кырдаалды туруктуу сактап калууга күчүбүз да, каражатыбыз да жетиштүү", — деди өлкө башчысы.
Кыргызстандын Жогорку Кеңеши экс-президент Курманбек Бакиевдин бийлиги кулатылгандан кийин, 2010-жылдын 10-октябрында шайланып, Кыргызстан парламенттик республикага айланган. 120 орундуу парламентке 80ден ашуун саясий партия ат салышкан.
