БИШКЕК, 30-июнь — Sputnik. "Элдик лотерея" сатып алгандардын акчасы кайтарылышы мүмкүн экенин ИИМ маалымат катчысы Бакыт Сейитов билдирди.
Буга чейин ИИМ "Райдер Эссошиэйтед Лимитед" компаниясына лотерея оюндарын өткөрүү үчүн уруксат мыйзамсыз берилгенин маалымдаган.
"Берилген лицензия жараксыз деп табылганына байланыштуу компанияга мындан ары утуш оюндарын өткөрүүгө тыюу салынат. Демек, байгелер ойнотулбайт. Билет сатып алгандарга компания акчасын кайтарып бериши мүмкүн. Бул маселени сот чечет", — дейт Сейитов.
"Райдер Эссошиэйтед Лимитед" түрк компаниясынын Бишкектеги филиалынын директору, Түркия жараны Танжа Кылыч жана ишкананын бухгалтери Мээрим Сыркынты убактылуу кармоочу жайга киргизилип, башкы күнөөкөр деп эсептелген Тойчубеков шейшемби күнү издөөгө алынды. Ал аталган компанияга лотерея оюндарын өткөрүү үчүн мыйзамсыз уруксат берип, бюджетке төлөнүүчү 31,5 миллион сомдон бошоткондугу үчүн айыпталууда.
"Райдер Эссошиэйтед Лимитед" түрк компаниясы 2013-жылдын январь айында филиалын ачып, "Элдик лотерея" брендинин негизинде иштеп келген.
