БИШКЕК, 30-июнь — Sputnik. Бишкек ТЭЦин Д, ДГ жана Г маркасындагы 900 миң тонна көмүр менен тендерди утуп алган "Рассвет Компани" ЖЧКсы камсыздай турганын Sputnik агенттигине "Электр станциялары" ААК билдирди.
Өкмөттүн "КР калкын жана экономикалык тармактарын 2015/2016-жылдардын күз-кыш мезгилине даярдоо жөнүндө" токтомуна ылайык, ТЭЦтин муктаждыгы 1,4 миллион тонна көмүрдү түзөт.
Жарыяланган тендерге үч компания катышкан. Натыйжада тендердик комиссиянын чечими менен "Рассвет Компани" ЖЧК жеңүүчү деп табылган.
"Бул ишкана үстүбүздөгү жылдын июль айынан баштап 2016-жылдын апрель айына чейин Бишкек ТЭЦине көмүрдү Казакстандын Шабыркүл кенинен алып келет. Бардык салык түрүн жана бажы чыгымдарын кошкондо көмүрдүн бир тоннасы 56 долларга бааланууда", — деп айтылат билдирүүдө.
"Электр станциялары" ААК жеңүүчү ишкана Кыргызстандын рыногунда 2013-жылдан бери ийгиликтүү иштеп жатканын маалымдайт. Сапат сертификаттары тендердик документтердин талабына ылайык келет.
