Сирияга чыгууга аракет кылган кыргызстандык аял Москвадан кармалды

БИШКЕК, 29-июнь — Sputnik. Москванын Домодедово аэропортунан Сирияга чыгып кетүүгө аракет кылган кыргызстандык аял кармалганын ИИМдин маалымат кызматы билдирет.

Маалыматка ылайык, Аламүдүн районундагы айылдардын биринде жашаган 25 жашар Хамиданын күйөөсү, эки кичинекей баласы бар. Москвада аны адамдарды Сирияга жөнөтүп турган Хасан аттуу адам тосуп алмак. 

Хамиданын айтымында, ал салттуу исламдын эрежелерин тутунуп жашап, бара-бара интернеттен диний агымдын башка түрлөрү менен жакындан тааныша баштайт. Хамида сүйлөшүүлөрдү Skype, Whats App жана "Одноклассники" сайты аркылуу жүргүзгөн. 

ИИМ маалыматы боюнча, 2015-жылдын мартында кармалган аял менен таанышуу үчүн  анын баракчасына өзүн ИМ террористтик уюмдун катышуучусумун деген Хаттаб аттуу адам чыккан. 

Маалыматка караганда, кат жазышкандан бир аз убакыт өткөндөн кийин Хаттаб Хамидага башка жакка көчүүнү ("хиджера" жасоону) сунуш кылат. Хаттабдын айтымында, мындай көчүп-конуу үчүн күйөөнүн макулдугу зарыл эмес. Ошондой эле ал Хамиданы жаңы паспорт менен камсыз кыларын билдирип, Сирияда тынч жашап, согуш аракеттерине кааласа гана катыша турганын айтат. Хамида макул болуп, Москвага келет. Шарт боюнча ал жактан Түркияга, андан ары Сирияга учуп кетмек. 

Алдын ала иликтөөлөр боюнча, Хамиданын кетишине үй-бүлөдөгү чыр-чатактуу турмуш, туугандарынын көңүл сыртында калуусу себеп болгон.

ИИМ аялдын Сирияга кетишин уюштурууга тиешеси бар адамдарды издөөгө алды.