БИШКЕК, 29-июнь — Sputnik. Курамында наркотикалык заттар кошулган дары-дармекти жазып берүүгө доктурларга тыюу салынгандыктан, катуу оорулуу кыргызстандыктар героинди көмүскө рыноктон сатып алууга мажбур болуп жатышканын банги саясаты боюнча Борбордук азия борборунун директору Александр Зеличенко билдирди.
"Мага онокологиялык дарты бар, оорусу жан чыдатпаган адамдар көп кайрылат. Аларга доктурлар тийиштүү дары жазып берүүдөн коркушат. Анткени мынчалык көп дары жазуунун себептери суралат. Ошондон улам адамдар базарга барып, героин сатып алышууда", — деп билдирди Sputnik агенттигине Зеличенко.
Анын айтымында, мындай көйгөйлөр өнүгүп келе жаткан өлкөлөрдө гана бар экени байкалат. Катуу оорулуу адамдардын мындай дары-дармек алуусун жеңилдетүүнү камсыздоочу чаралар мыйзам чегинде иштелип чыгышы зарыл.
