Премьер Элвира Сариевага эскертүү берди

БИШКЕК, 27-июнь — Sputnik. Премьер-министр Темир Сариев бир катар мекеме, министрликтердин жетекчилерине сөгүш жарыялаганын өкмөттүн маалымат кызматы билдирди.

26-июнда Темир Сариевдин жетекчилиги алдында өкмөттүн кезектеги жыйыны болуп өтүп, анда эмгек мигранттардын абалы, КРда балдарга ырайымсыз мамилени алдын-алуу жана жоюу чаралары жана 2014-2020-жылдарга дин чөйрөсүндө мамлекеттик саясаттын концепциясын ишке ашыруу планы каралды.

Сариев буга чейин берилген тапшырмалардын негизинде Жалал-Абад облусунун Ала-Бука районундагы үч мектеп окуучунун өмүрүн алган жол кырсыгынын алдын-албаганы үчүн Билим берүү министринин орун басары Токтобүбү Ашымбаевага, Ала-Бука районунун акими Алымкул Кулуевге сөгүш берди. Ал эми Билим берүү жана илим министри Эльвира Сариевага эскертүү берип, Ала-Бука райондук билим берүү башкармалыгы жана Жалал-Абад облустук жол кайгуул кызматынын жетекчилигинин жоопкерчилигин кароо маселесин койду.

"Премьер-министр мектеп бүтүрүүчүлөрүнүн жол коопсуздугун сактабастан, өмүрүн тобокелге салган көрүнүштөр башка аймактарда бар экенин билдирип, тиешелүү мамлекеттик органдарды көзөмөлдү күчөтүүгө чакырды", — деп айтылат билдирүүдө. 

Мындан сырткары Сариев балдарга карата зомбулуктун алдын алуу боюнча мамлекеттик органдардын координациялык иштеринин начар болуп жатканын белгилеп, өкмөт аппаратынын өнүктүрүү бөлүмүнүн башчысы Замира Ажыгулова жана Бишкек шаарынын вице-мэри Замирбек Малабековго сөгүш жарыялады. Ошондой эле балдарга ырайымсыз мамилени алдын-алуу жана жоюу чаралары боюнча токтом долбоорун кайрадан иштеп чыгууну тапшырды.

Үчүнчү маселе катары каралган 2014-2020-жылдарга дин чөйрөсүндө мамлекеттик саясаттын концепциясын ишке ашыруу планы боюнча өкмөт башчы Ички иштер министрлиги менен экстремисттик багыттагы иш алпарган уюмдардын тизмесин 20 күндүк мөөнөт ичинде кайрадан тактап чыгуу тапшырмасын берди.