БИШКЕК, 25-июнь — Sputnik. Ош шаарынын сейил багында турак-жай салуу үчүн эки жаранга берилип кеткен аянттар сот чечими менен мэрияга кайтарылып берилди. Бул туурасында Ош шаарынын мэри Айтмамат Кадырбаев "Ата-Түрк" сейил багын оңдоп-түзөө иштери менен таанышып жүргөндө билдирди.
Анын айтымында, мындан ары жер тилкелери мыйзамсыз берилбейт.
"Буга чейин ушул сейил багында турак-жай салуу үчүн эки жараныбызга берилип кеткен аянттарды, парктын ичиндеги менчикке өтүп кеткен коомдук даараткананы мыйзам негизинде соттун чечими менен мэрияга кайтарып алдык. Мындан ары эс алуучу жайлардын, дегеле шаардагы тургундар колдоно турган бардык жерлердин бир сантиметри да жеке менчике кетпейт деп ишендирип кетем", — деди Кадырбаев.
Ош шаарындагы кароосуз калган "Ата-Түрк" сейил багы август айында колдонууга берилмекчи. "Ак Бата" ишканасынын жетекчиси Манас Абдыкадыровдун айтымында, аталган сейил бактын курулуш иштери 70 пайызга бүтүп калды.
