БИШКЕК, 25-июнь — Sputnik. Санкт-Петербург шаарында Чыңгыз Айтматов атындагы сквер ачыла турганын шаардын расмий сайты билдирди.
Сквердин ачылышы Санкт-Петербург шаарында өтүп жаткан Бишкек күндөрүнө дал келди.
Маалыматка ылайык, аталган иш чарага шаарды жашылдандыруу жана тышкы байланыштар комитетинин өкүлдөрү, андан сырткары, Бишкек шаарынын мэри Кубанычбек Кулматов баштаган делегация катышат.
Улуу жазуучунун аты аталган скверге 2012-жылы Кыргызстандын өкмөтүнүн өтүнүчү менен берилген. Сквер Санкт-Петербург шаарынын Калинин районундагы Руставели менен Карпинская көчөлөрүнүн кесилишинде жайгашкан.
Аталган скверде оңдоо иштери бүткөрүлүп, көрктөндүрүү аяктады. Бул жерде газондор, жолдор оңдолуп Кыргызстан тараптан Санкт-Петербург шаарына белекке берилген тянь-шань карагайлары, кайың жана башка дарактардын түрлөрү отургузулду.
