БИШКЕК, 25-июнь — Sputnik. Япония бийлиги бейшембиде камактагылардын бирине карата өлүм жазасын ишке ашырды деп билдирет РИА Новости Киодо агенттигине таянуу менен.
Агенттик кылмышкер ким экендиги жана анын иши боюнча маалыматтарды келтирген эмес.
Мурунку өлүм жазасы өткөн жылдын августунда ишке ашырылган. Азыр мындай жазаны Японияда 125 адам күтүп жатат.
Эреже катары, өлүм жазалары сот чечими чыгар замат эмес, бир нече жылдан кийин ишке ашырылат. Кесилген адам жазанын аткарылышын жылдап күтүшү мүмкүн, бирок ал ишке ашырылары туурасында өлөр күнү эртең менен гана билет. Японияда өлүм жазасы дарга асуу жолу менен аткарылат.
Эл аралык укук коргоо органдары Япониянын жазанын бул түрүн адамкерчиликсиз катары алып салууну суранып келет. Бирок коомдук сурамжылоолордун натыйжасына караганда, өлкө калкынын 85%ы өлүм жазасын колдойт.
