БИШКЕК, 25-июнь — Sputnik. Республика боюнча жарандардын биометрикалык маалыматты тапшыруу процессинин жыйынтыгы алымсындырарлык эмес, деп билдирди депутат Абдыжапар Бекматов парламентте.
Анын айтымында, азыр болгону 2,5 миллионго жакын гана адам тапшырган.
"Жакында анын жүрүшүнө байкоо жүргүздүк, жыйынтыгы анчалык алымсындырарлык эмес. Жалпысынан 3 млн. 800 миӊ адам маалымат тапшырууга тийиш болсо, 2 млн. 500 миӊ адам өттү, калганы каттала элек. Минтип отурсак, 3 жылда араӊ аягына чыгабыз", — деди депутат Бекматов.
Анын айтымында, орто эсеп менен күнүнө 20-30 адам гана биометрикалык маалыматын тапшырат экен.
Депутат эл арасында маалымат жетишсиз болуп, түшүндүрүү иштери өз деӊгээлинде жүргүзүлбөй жатканын кошумчалады.
"Биометрикалык маалыматтарды тапшыруу — мамлекеттик саясат. Алдыда парламенттик шайлоо өткөнү турат. Мындай абал шайлоо учурунда ар кандай талаш-тартыш менен нааразылык пайда кылышы ыктымал. Ошондуктан, биометрикалык маалыматтарды жыйноо өнөктүгүн жандандырып, калк арасында түшүндүрүү иштерин жүргүзүш керек", — деди Бекматов.
Жарандардын биометрикалык маалыматтарын чогултуу кампаниясы 2014-жылдын август айында башталган. 16 жаштан жогорку бардык жарандар бармак издерин тапшырышы керек. Маалыматтарды чогултуу 2015-жылы 1-августта аяктайт. Жалпысынан болжол менен 3 миллион 641 миң киши тапшырышы керек.
