БИШКЕК, 23-июнь — Sputnik. Бүгүн башталган "Бизге баары бир эмес!" деп аталган жарандык форумдун уюштуруучуларын бири Рита Карасартова, Баш мыйзамга өзгөртүү киргизүүгө болбой тургандыгын, сунуш мыйзам бузуу менен коштолуп жаткандыгын Sputnik маалымат сайтына билдирди.
Коомдук талдоо институнун жетекчиси Карасартова бүгүнкү форумда парламент мындан ары кандай болушу керектиги, Баш мыйзамдык реформага баруу аракеттери дагы бир нече маселелер талкууланарын айтты.
"Конституцияга өзгөртүүлөрдү киргизген болбойт, буга чейин Өмүрбек Текебаев өзү "Баш мыйзамды кайра-кайра өзгөртпөй эле ошону менен жашап көрөлү" деп айтып келген. Эми сөзүнө турбай жатат. Учурда үч эле депутат демилге кылууда, ал эми мыйзам боюнча 80 депутат кол коюшу керек. Абдан көп мыйзам бузуулар бар. Эгерде форумга барып, жок, өзгөрүү абдан сонун деп далилдеп бере турган болсо, далилдеп көрүшсүн. А биз өзүбүздүн жарандык позициябызды айтабыз", — деди Карасартова.
Ал форумдун жыйынтыгы боюнча президентке жана ЖК депутаттарына кайрылуу жолдонорун кошумчалады.
