БИШКЕК, 19-июнь — Sputnik. Кыргызстанга инвестиция салуу коопсуз экенин, керек болсо бул пайда алып келерин мамлекет далилдеши керек деп эсептейт Камсыздоочулар, өндүрүүчүлөр жана дистрибьютерлер ассоциациясынын президенти Гүлнара Ускенбаева.
Ал Sputnik агенттигине берген маегинде КМШ ишкерлеринин Европа менен америкалыктарга караганда Кыргызстан тууралуу так маалыматы бар экенин белгиледи.
"Өлкөнүн имиджи – бул түбөлүктүү нерсе. Бизнес саясий жана экономикалык кыйынчылыктарды унутушу үчүн көптөгөн убакыт талап кылынат. Андыктан, биз бул жаатта абдан тыкыр иш алып барышыбыз керек", — деди Ускенбаева.
Ускенбаева мисал катары учурда Россияда өтүп жаткан Петербург эл аралык экономикалык форумун келтирди. Анда кыргызстандык делегация октябрь айында кытай ишкерлеринин Кыргызстанга келүүсү тууралуу макулдашууга жетишкен. Маалыматка ылайык, кытайлыктар инвестиция үчүн тийиштүү тармактарды тандап алышат.
