БИШКЕК, 16-июнь — Sputnik. Бишкекте эл аралык деңгээлдеги көргөзмөлөрдү өткөрүү үчүн кесиптик багыттагы имарат куруу пландалып жатканын Соода-өнөр жай палатасынын (СӨП) менеджери Элиза Боталиева билдирди.
Ал Кыргызстанда мындай имарат жоктугун белгиледи.
"Иш-чаралар негизинен көргөзмөлөр үчүн ылайыкташпаган машыгуучу спортзалдарда же Кожомкул атындагы спорт сарайынын фойесинде өтөт", — дейт Боталиева.
Бул долбоор Кыргызстандын ЕАЭБге киришине байланыштуу өзгөчө мааниге ээ. Комплекстин курулушу жакынкы жана алыскы чет мамлекеттердин ири компанияларын тартууга өбөлгө болуп, жергиликтүү ишканалардын ЕАЭБдин бизнес коомчулугу менен кызматташуусун тереңдетүүгө мүмкүндүк берет деп белгиледи Боталиева.
"Имаратта көргөзмө борбору гана эмес, эл аралык жана республикалык деңгээлдеги башка коомдук иш-чараларды өткөрүүчү жайлар да болот. Долбоордун уникалдуулугу ушунда", — деди менеджер.
"Комплекстин жалпы аянты 40 миң чарчы метр келип, баасы болжол менен 50 миллион АКШ долларын түзөт. Беш жылдай убакытта сарпталган чыгымды акташы күтүлүүдө ", — деп баса белгиледи Боталиева.
Россия, Кытай, Малайзия жана Түркия мамлекеттеринин инвесторлору долбоорду ишке ашырууга кызыкдар экенин билдиришти. Адис көргөзмөлөр ата мекендик өндүрүүчүлөрдү колдоп, көтөрмөлөөнүн натыйжалуу ыкмасы болорун кошумчалады.
