БИШКЕК, 15-июнь — Sputnik. Кызматташуу жөнүндөгү макулдашуунун негизинде "Ден соолукка карай бирге" коомдук фонду Саламаттык сактоо министрлиги менен биргеликте оорулуу балдарды Германияда дарылатуу үчүн кароодон өткөрө турганын аталган коом билдирет.
Кароо үч күнгө созулат: 15-июнда Ысык-Ата районуда, 16-июнда Эне жана баланы коргоо улуттук борборунда, 17-июнда Чолпон-Ата шаарынын үй-бүлөлүк медицина борборунда саат тогузда башталат.
"Аталган иш-чара үчүнчү ирет өтүүдө. 2013-жылы Бишкекте жана 2014-жылы Чолпон-Атада өткөн кароодо оор диагноз коюлган 15 бала Германияга чакырылып, анын жетөөнө ийгиликтүү операция жасалган. Калган сегиз бала учурда немис клиникаларында дарыланып жатат. Мында илдетти дарылоо үчүн Кыргызстандын клиникаларынын шарт-мүмкүнчүлүгү жетпеген оорулуу балдар тандалат", — деп айтылат билдирүүдө.
Учурда 300 бала тууралуу маалымат келип түшкөн, анын 211и кароодон өтүшү күтүлүүдө.
Эмдиги жылы Кыргызстандын Талас облусу боюнча оорулуу балдар кароодон өтөрү кошумчаланды.
