БИШКЕК, 14-июнь — Sputnik. Жекшемби күнү болгон шамал Бишкек шаарына олуттуу зыян алып келген жок, анын ылдамдыгы секундуна 12 метрге чейин жеткенин Өзгөчө кырдаалдар министрлиги билдирди.
Маалыматка ылайык, секундуна 20 метрге чейин жеткен шамал Кара-Балта шаарында жана Чүй облусунун Панфилов райондорунда сезилип, шамал олуттуу зыян алып келген эмес.
Жекшемби күнү ӨКМ Бишкекте катуу шамал болушу мүмкүндүгүн эскерткен болчу. Учурда Бишкек шаарында абал тынч, жаан жаап жатат.
Буга чейин 12-июнда кечинде ӨКМ ушундай эле эскертүү берген. Катуу шамал жогорку зонада жана Байтик айылында болгон. Ошондой эле, Чаекте (Жумгал району) шамалдын ылдамдыгы секундуна 22-24 метрге жеткен.
Дүйшөмбү күнү 9-июнда Бишкек шаарында жана Чүй облусунда кечки саат сегиздер чамасында катуу шамал болуп, үйлөрдүн чатырларын учуруп, бактар сынып автомашиналарды басып калган болчу. ӨКМдин маалыматы боюнча шамалдын ылдамдыгы секундуна 25-27 метрге жеткен. Шамалдын кесепетинен сегиз машина жабыркап, 80ден ашык бак сынган.
