БИШКЕК, 13-июнь — Sputnik. Президент Алмазбек Атамбаев өмүрү легендага айланган маркум Токтогон Алтыбасарованын үй-бүлөсүнө жана жакындарына көңүл айткан телеграмма жөнөткөнүн өлкө башчысынын маалымат кызматы билдирет.
Маалыматка ылайык, Токтогон апа согуш жылдарында Ысык-Көл областындагы Түп районуна караштуу Күрмөнтү айылдык кеңешинин катчысы болуп иштеп, блокададагы Ленинград шаарынан келишкен балдарды өз камкордугуна алган. Ал жаңы келген ар бир наристени бооруна тартып, ысымдарын да өзү койгон. Анткени Ленинграддан Ысык-Көлгө чейинки үч айга созулган жолдо билегине байланган кездеме менен балдар көз жашын сүртө беришип, анда жазылган ысымдары өчүп калган.
"Улуу Ата-Мекендик Согуш жылдарында Токтогон апа блокадада калган Ленинград шаарынан жер которуп келишкен 150 балага эне ордуна эне болгон. 16 жаш күлгүн курагында ал балдарга мээримин төгүп, ысыгына күйүп, суугуна тоңгон", — деп айтылат телеграммада.
Токтогон апанын камкордугуна бөлөнгөн блокада балдары Ысык-Көлдө аман-эсен чоңоюшуп, СССРдин ар кайсы жерлерине кетишкен. Алар жазган каттарды Токтогон апа аяр сактап, улам кайталап окуганды жакшы көрчү экен.
Президент Атамбаев Токтогон Алтыбасарованын үй-бүлөсүнө жана жакындарына терең кайгыруу менен көңүл айтып, Токтогон апанын өрнөктүү өмүрү кыргызстандыктар үчүн ар дайым үлгү болуп кала берерин жана анын жаркын элеси унутулбай тургандыгын белгиледи.
Өлкө башчынын буйругу менен маркум Токтогон Алтыбасарованын үй-бүлөсүнө 100 миң сом материалдык жардам бөлүндү.
